«Наукон фестиваль» - Ирыстоны
Октябрь 8, 2016
Просмотров: 189
Знон Цӕгат Ирыстоны медицинон академийы конференциты залы кадджын уавӕры байгом VI Ӕппӕтуӕрӕсеон наукон фестивалы регионалон кӕронбӕттӕн хай. Ацы фестиваль нӕ бӕстӕйы регионты вӕййы ӕрвылаз. Йӕ саразыны хъӕппӕрис фыццагдӕр равдыста Мӕскуыйы паддзахадон университеты ректор Виктор Садовничий.
Кадджын мадзалы архайдтой РЦИ-Аланийы Парламенты, Ахуырад ӕмӕ наукӕйы, Культурӕйы министрадты бӕрнон кусджытӕ, нӕ республикӕйы уӕлдӕр скъолаты разамонджытӕ, докторанттӕ, аспиранттӕ, студенттӕ ӕмӕ скъоладзаутӕ.
Конференцийы райдайӕны йӕ саразджытӕн ӕмӕ архайджытӕн зӕрдиаг арфӕтӕ ракодтой РЦИ-Аланийы Парламенты Сӕрдары фыццаг хӕдивӕг Къесаты Станислав. Уый загьта, зӕгъгӕ, ахӕм наукон фестиваль у тынг хъӕугӕ.
Йӕ фӕрцы суинаг ӕмӕ ӕрыгон ахуыргӕндтӕ зонгӕ кӕндзысты кӕрӕдзиимӕ, разӕнгарддӕр уыдзысты наукон ӕнтыстытӕм ӕмӕ уӕлахизтӕм. Уый фӕстӕ ма фестивалы архайджытӕн зӕрдиаг арфӕтӕ ракодтой РЦИ-Аланийы Парламенты комитеты сӕрдар Еленӕ Князева, ахуырады ӕмӕ наукӕйы министры хӕстӕ рӕстӕгмӕ ӕххӕстгӕнӕг Сӕлбиты Зитӕ, культурӕйы министры хӕдивӕг Мамсыраты Сослан.
Конференцийы сӕйраг доклад скодта физикон-математикoн наукӕты доктор, Уӕрӕсейы наукӕты академийы Дзӕуджыхъӕуккаг наукон центры разамонӕг Къусраты Анатоли (нӕ республикӕйы фестиваль саразыны хъӕппӕрис уый бахаста). Йӕ доклад баст уыд, математикӕйы наукӕйы бӕрӕггонд чи нӕма ӕрцыд, уыцы сусӕгдзинӕдтимӕ. Ныр 9 октябрмӕ фестивалы архайджытӕн уыдзӕн семинартӕ, фембӕлдтытӕ ӕмӕ зонадон экскурситӕ.
ГАСАНТЫ Валери