Наукæйы бæрзæндтæм. Газета «Рæстдзинад»

Дзæуджыхъæуы ЦИПУ-йы йæ куыст райдыдта Æппæтуæрæсеон фестиваль «Наука 0+»-ы регионалон къæпхæн. Мадзалы нысан у рæзгæ фæлтæр æмæ æрыгон фæсивæды йæм здахын, сæ гæнæнтæ æмæ зонындзинæдтæн сын ахадгæ мадзæлттæ агурын.

Фестивалæн бындур æвæрд æрцыд 2012 азы Мæскуыйы паддзахадон университеты хъæппæрисæй, æмæ йæ архайджыты нымæц фылдæрæй фылдæр кæны. Нæ бæстæйы алы субъекты уæлдæр ахуырадон скъолатæ ацы хъæппæрис айстой, æмæ алчидæр алы аз бацæттæ кæны фестиваль.

Дзæуджыхъæуы наукæйы фестиваль ныр æртыккаг хатт цæуы арæзт. Архайынц дзы нæ республикæйы наукон организацитæ, уæлдæр скъолатæ, астæуккаг æмæ уæлæмхасæн ахуырады æвзонг фæсивæд, музейтæ æмæ библиотекæты кусджытæ та сараздзысты наукон-популярон лекцитæ. Уымæй уæлдай,  университеты тыргъты нæ республикæйы цæрджытæ, скъоладзаутæ æмæ студенттæ фендзысты æрыгон ахуыргæндты æнтыстджын куыстытæ, наукон-техникон, инновацион, тематикон экспозицитæ, интеллектуалон ерыстæ æмæ æндæр наукон-рухстауæн мадзæлтты равдыст.

Фестивалы æрыгон ахуыргæндтæ æмæ уазджытæн æртæ боны арæзт цæудзысты мастер-кластæ, алыхуызон наукон ахуыртæ.

Мадзалы архайджытæн арфæтæ ракодтой  Дзæуджыхъæуы наукон центры директор Цыбырты Алексейы номæй Верæ Абатурова, РЦИ-Аланийы ахуырад æмæ наукæйы министры хæдивæг Мæхъиты Людмилæ æмæ ЦИПУ-йы наукон куысты проректор Тенгиз Тиникашвили.

– Æнæ наукæйæ цардæн размæ цæуæн нæй. Уый нæ фидæн æмæ нæ абон у. Ирыстон курдиатджын сывæллæттæй кæддæриддæр хъæздыг уыдис. Уыдонæй бирæтæ абон æнтыстджын къахдзæфтæ кæнынц техникон прогрессы тыгъдады. Ис сын æппæт фадæттæ дæр сæ рæзтæн, – загъта министры хæдивæг.

Наукæйы фыццаг фестиваль ацыд 2006 азы Мæскуыйы паддзахадон университеты ректор, академик Александр Садовничийы хъæппæрисæй. 2007 азы мадзал ссис горæтаг, 2011 азы та – Æппæтуæрæсеон.

Фестивалы фыццаг бон архайджытæ фендзысты «Наука – обществу», зæгъгæ, нæ республикæйы æрыгон ахуыргæндты æнтыстдзинæдты равдыст. Дыккаг хай та арæзт у конференцитæ æмæ мастер-кластæй. Æртыккаг бон та уыдзæн музейты Гом дуæртты бон. Фестивалы архайджытæ фендзысты нæ республикæйы хъæздыг историон экспозицион залтæ.

Материал опубликован в газете «Рæстдзинад» от 12.10.2024 г.