Дзæуджыхъæуы наукон центры равзæрдыл сæххæст 25 азы
Декабрь 12, 2019
Просмотров: 454
Уæрæсейы наукæты академийы Дзæуджыхъæуы наукон центры равзæрдыл сæххæст 25 азы. Сæ æнтыстдзинæдтæ хъуыстгонд сты канд Уæрæсейы нæ, фæлæ ма фæсарæнты дæр. Юбилейы фæдыл Цæгат Ирыстоны Мариинаг театры филиалы ацыдысты кадджын мадзæлттæ. Программæ уыд цымыдисаг, схъæздыг æй кодтой наукон равдыстытæй æмæ паддзахадон филармонийы оркестры концертæй.
25 азмæ Дзæуджыхъæуы наукон центры къухы бирæ æнтыстдзинæдтæ бафтыд. 1994-æм азы Дзæуджыхъæуы наукон иртæстытæн æххуыс кæныны системæ нæ уыд. Уæд Ирыстоны фыццаг президент Галазты Æхсарбеджы уынаффæмæ гæсгæ, нæ республикæйы сарæзтой паддзахадон наукон центр. 2000 азы та центры бындурыл сфæнд кодтой Уæрæсейы наукæты академийы центр саразын. Абон зæгъæн ис, æмæ центр у Уæрæсейы хуссары ахсджиагдæр федералон наукон центртæй иу.
Ныртæккæ центры кусынц, фдерелон нысаниуæг кæмæн ис, ахæм ахсджиаг наукон проекттыл. Цæттæ кæнынц уæлдæр къæпæхæны наукон кусджытæ математика, геофизикæ, биомедицинæ, историкон æмæ филологон, æхсæнадон æмæ хъæууон-хæдзарадон наукæты. Центры кусджытæн юбилейы фæдыл арфæйы ныхæстæ ракæнынмæ æрбамбырд сты Алыгея, Дагестан, Цæцæн, Кæсæг-Балхъары наукон центрты минæвæрттæ. Хуссар Ирыстоны президент Бибылты Анатолий куыд фæбæрæг кодта, афтæмæй центр æрбангом кодта куыд Цæгат, афтæ Хуссар Ирыстоны наукон кусджыты.
Центры кусджыты нæ республикæйы парламенты номæй, наукæйы рæзтмæ стыр æвæрæн кæй бахастой, уый фæдыл схорзæхджын кодтой кады гæххæттытæй. Парламенты сæрдар Алексей Мачневы ныхæстæм гæсгæ, центры руаджы нæ республикæйы наукæ размæ стыр къахдзæф ракодта.
Юбилейы фæдыл центры кусджыты банымадтой, куыд нæ республикæйы ахуырад æмæ наукæйы министрад, афтæ Дзæуджыхъæуы администрацийы номæй дæр. Кадджын хæрзиуджытæ саккаг кодтой центры филиалты кусджытæн. Мадзалы уазджытæн центры куысты тыххæй равдыстой видеоæрмæг. Бæрæгбонмæ ма центры филиалтæ сарæзтой равдыст. Наукон куыстытæ, монографитæ, патенттæ. Се 'хсæн Цæгат Ирыстоны социалон æмæ гуманитарон иртæстыты институт дæр.
Ныртæккæ центры ис 600 наукон кусæджы.центрæн ис 5 филиалы: социалон æмæ гуманитарон иртæстыты институт, хуссары математикон институт, геофизикон, биомедицинон иртæстыты институттæ æмæ хæххон хæдзарады институт. Се 'ппæт дæр кæнынц ахсджиаг æмæ хъæугæ куыст. Центры бындурыл арæх арæзт цæуынц æппæтдунейон математикон форумтæ. Æрбахонынц сæм хуыздæр экспертты.
Фидæнмæ дæр центрмæ бирæ фæндтæ ис. Фыццагдæр, филиалтæй иу къорд саразын.
Хуасдзауты Алинæ
Видеоматериал размещен на сайте Национального телевидения "Осетия-Ирыстон"