Дзæуджыхъæуы кусын райдыдта æрыгон ахуыргæндты æппæтдунеон скъола-конференци

Æрвылаз æй аразынц Абайты Васойы номыл Цæгат Ирыстоны гуманитарон æмæ социалон иртæсæнты институт æмæ Нациты ‘хсæн ахастдзинæдты фарстаты министрад.

Дзæуджыхъæуы байгом æрыгон ахуыргæндты æппæтдунеон скъола-конференци. Æрвылаз æй аразынц Абайты Васойы номыл Цæгат Ирыстоны гуманитарон æмæ социалон иртæсæнты институт æмæ Нациты ‘хсæн ахастдзинæдты фарстаты министрад. Конференцийы архайынц Норвеги, Германи, Украинæ, Хуссар Ирыстон æмæ Цæцæны минæвæрттæ. Скъола ахæсдзæн 3 боны. Уæрæсейы номдзыд ахуыргæндты лекцитæ æмæ дæсныйад æвдисæн ахуыртæ, секциты зонадон разамонджытимæ куыст. Конференцийы программæ у бирæвæрсыг.

Студенттæ, аспиранттæ æмæ магистранттæ. Се ‘ппæт дæр сæ фидæн фæнд кæнынц наукæимæ сбæтттын. Истори, этнологи, филологи æмæ политологи. Сæ зонадон куыстытæ баст сты ацы къабæзтимæ. Скъола-конференцийы архайджытæ – Кæсæг-Балхъар, Цæцæн æмæ Хуссар Ирыстоны минæвæрттæ. Фæсаууонмæ дзы архайынц æрыгон ахуыргæндтæ Норвеги æмæ Германийæ. Бирæтæ дзы ахæм конференцийы фыццаг хатт не сты.

Скъолайæн йæ сæйраг хæс у – æрыгон ахуыргæндты фæлтæрддзинад фæфылдæр кæнын, цæмæй сæ фыццаг къахдзæфтæ уæндондæрæй кæной. Абон сын Уæрæсейы номдзыд ахуыргæндтæ сарæзтой лекцитæ æмæ дæсныйад æвдисæн ахуыртæ. Корпусон лингвистикæйы тыххæй скъолайы архайджытæн радзырдта Арсений Выдрин. Уæрæсейы наукæты академийы лингвистикон иртæсæнты институты хистæр наукон кусæг. Арсений йæ кандидатон зонадон куыст дæр сбаста ирон æвзагимæ. Уымæ гæсгæ йын конференцийы бацархайын уыд уæлдай ахсджиаг.

Ацы аз æрыгон ахуыргæндты æппæтдунеон скъола-конференци байгом 14-æм хатт. Сбастой йæ гуманитарон наукæйы сæйраг фарстатимæ. Конференци кусдзæн 3 боны. Дыккаг бон байхъусдзысты архайджыты наукон хъусынгæнинæгтæ æмæ докладтæм алы секциты. Фадат сын уыдзæн куыстытыл бæстон æрныхас кæнын, фæрстытæ раттын, гæнæн ис, æмæ ног хатдзæгтæм дæр æрцæуын.

Скъола арæзт у Цæгат Ирыстоны гуманитарон æмæ социалон иртæсæнты институт æмæ нациты ‘хсæн ахастдзинæдты министрады хъæппæрисæй.

Ацы конференцийы руаджы наукæмæ фылдæр фæсивæд раздахынц се ‘ргом, наукæйы фарстатæ алывæрсыгæй базонынц æмæ фидар къахдзæфтæй дарддæр ацæуынц зонады фæндагыл. Уымæн æвдисæн у, раздæр студенттæй чи архайдта ацы скъолайы, уыдонæй бирæтæ ныртæккæ наукæты кандидаттæ кæй систы, уый.

Æрыгон ахуыргæндтæ ма абалц кæндзысты Дæргъæвсмæ. Фендзысты историон-археологон комплекс. Уым байхъусдзысты аланты цыртдзæвæнты тыххæй лекцимæ. Уый фæстæ скъолайы куыстæн хатдзæгтæ скæндзысты.

Материал опубликован на сайте Национального телевидения "Осетия-Ирыстон" /24.09.2020/ 21:08