Сœрдыгон наукон ахуыртœ œрдзы хъœбысы
Июнь 28, 2013
Просмотров: 291
«Рœстдзинад», №110 (23418) 2013 азы 28 июнь
Абайты Арбилянœ
Дзœуджыхъœуы наукон центры Хуссайраг математикон институт РЦИ-Аланийы Хицауады, Ахуырады œмœ наукœйы, Фœсивœды, физикон культурœйы œмœ спорты министрадты, Цœгат Ирыстоны паддзахадон университеты œххуысзей 25 июнœй 25 июлмœ аразы Дунеон наукон-ахуырадон сœрдыгон форум.
Ирыстоны рœсугъд œрдзы хъœбысы Фыййагдоны (Фœсивœдон туристон-бœстœзонœн центр «Барс»-ы) œмœ Цъœйы мœйы дœргъы кусдзысты Цыппœрœм сœрдыгон математикон скъола математикœйы ахуыргœнджытœн, бœлвырд наукœты (математикœ, информатикœ, фи- зикœ) 8-œм сœрдыгон скъола 7-10-œм кълœсты ахуыргœнинœгтœн, Æрыгон ахуыргœндты 9-œм регионалон скъола-конференци «Дзœуджыхъœуы фœсивœдон математикон скъола» œмœ Дунеон наукон конференци «Порядковый анализ и смежные вопросы математического моделирования».
Æмткœй райсгœйœ, форумы нысан у скъоладзауты математикœ, информатикœ œмœ физикœмœ œмхиц кœнын, ацы наукœтœ Ирыстон œмœ сыхаг республикœты рœзгœ фœсивœды цœсты кадджын кœнын, ахуыргœнджыты œмœ ахуыргœнинœгты наукон-иртасœн куыстмœ разœнгард кœнын.
Æртœ наукон-ахуырадон сессийы рœстœг ахуырджытœн, œрыгон ахуыргœндтœн œмœ математикœмœ зœрдœргьœвд скъоладзаутœн лекцитœ œмœ семинартœ кœндзысты хъуыстгонд уœрœсейаг математиктœ, ахуыргœнœн чингуыты автортœ – физикон-математикон наукœты доктортœ œмœ кандидаттœ Къусраты Анатоли (Дзœуджыхъœу), С. С. Кутателадзе (Новосибирск), Г.Г. Магарил-Ильяев (Мœскуы), ЮГ. Никаноров (Дзœуджыхъœу), А.О. Ватульян (Ростов), О.И. Горбанева (Ростов), В.Г. Цибулин (Ростов), ба¬зонгœ сœ кœндзысты бœл¬вырд наукœты фœстаг œнтыстдзинœдтимœ, педагогикœйы ногдзинœдтимœ œмœ бœлвырд наукœты лыггœнинаг фарстатимœ.
Форумы архайджыты 'хсœн сты ахуыргœндтœ Уœрœсейœ œмœ фœсарœнтœй – Дзœуджыхьœу, Налцыкк, Грозна, Махачкала, Ростов, Шахты, Волгодонск, Таганрог, Мœскуы, Воронеж, Новосибирск œмœ œндœр горœттœй, уыдонимœ Узбекистаны, Гуырдзыстоны, Украинœйы, Турчы, Ирландийы, Грецийы, Голландийы, Испанийы наукœйы минœвœрттœ.
Конференцийы œрмœджытœ мыхуыргонд œрцœудзысты наукон œмбырдгонды, стœй сери «Итоги науки. Юг России. Математический форум»-ы радон рауагъды, хицœнœй рацœудзœн лекторты статьяты œмбырдгонд дœр.
Математикœйы ахуыргœнджытœн та лœвœрд œрцœудзœн зонындзинœдтœ фœфылдœр кœныны œвдисœндартœ œмœ форумы архайœджы сертификаттœ, скъоладзаутœн дœр – сертификаттœ.